9/17/2012

သည်အချိန်ဟာ အကောင်းဆုံးနှင့် အဆိုးဆုံးအချိန်ပါပဲ


လူသားသမိုင်းကို ပြန်ခြုံကြည့်မယ်ဆိုရင် လူသားတစ်ဦးချင်းဆီရဲ့ ဘ၀အိပ်မက်များဖြင့် ဖန်တီး တည်ဆောက်လာခဲ့ရကြောင်း တွေ့ရပါတယ်။ ရှေးခေတ်က တိုင်းပြည်များကို အိပ်မက်များရဲ့စွမ်းအားဖြင့် တည်ထောင်ခဲ့ကြပါတယ်။ ကျွန်မ ဘာပြောချင်တာလဲဆိုတော့ ယနေ့ ကျွန်မတို့ရဲ့တိုင်းနိုင်ငံသည် ပြုပြင် ပြောင်းလဲမှုများနဲ့ စတင်နေပြီဖြစ်တဲ့အတွက် အိပ်မက်ထဲမှာပဲ စိတ်ကူးယဉ်မနေသင့်တော့ဘဲ တကယ့် လက်တွေ့ဘ၀ကို အကောင်အထည်ဖော်ဆောင်ဖို့ အိပ်မက်မှ နိုးထရမယ့် အချိန်အခါ ရောက်ရှိလာနေပါပြီ။ တိမ်ညိုတိမ်မင်းများ ဖုံးလွှမ်းပြီး နေရောင်ထွက်ပေါ်စပြုလာနေတဲ့ ကောင်းကင်ယံမှ နေမင်းကြီးကို မော့ကြည့် ကြိုဆိုလိုက်တဲ့အခါ ရင်ထဲမှာ ဖြစ်ပေါ်လာတဲ့ အားသစ်အင်သစ်နဲ့ အရာရာအတွက် ပြင်ဆင်ထားဖို့ သင့်ပါပြီ။


ယခုအားလုံးသိကြတဲ့အတိုင်း အကောင်းလား၊ အဆိုးလားဆိုတဲ့ ဝေဖန်ချက်တွေကြားထဲမှာ နစ်မျော မနေဘဲ နိုင်ငံတစ်နိုင်ငံ တိုးတက်ဖို့အတွက် နိုင်ငံအတွင်းမှာ နေထိုင်တဲ့ နိုင်ငံသူနိုင်ငံသားအားလုံးက ၀ိုင်းဝန်း လုပ်ဆောင်မှသာ အကောင်းတကာ့ အကောင်းဆုံးကို ရရှိနိုင်မှာ ဖြစ်ပါတယ်။ အနာဂတ်တွေဟာ ကျွန်မတို့ ရှေ့မှာ ရှိနေကြတယ်ဆိုတာ မဟုတ်ပါဘူး။ ရှိပြီးနှင့်နေတာသာ ဖြစ်ပါတယ်။ ဘာတွေ ဘယ်လို ပြောင်းလဲ ပြောင်းလဲ အရာရာအတွက် ရင်ဆိုင်နိုင်အောင် ပြင်ဆင်ထားရမှာ ဖြစ်ပါတယ်။ ဘာလို့လဲဆိုတော့ ပြောင်းလဲလာတာနဲ့အမျှ မြန်ဆန်မှုက ဖြစ်ပေါ်နေလို့ပါပဲ။ နောင်အနာဂတ် ဘာဖြစ်မလဲဆိုတာထက် ယခု လက်ရှိ ဘယ်လိုနေမလဲဆိုတဲ့အပေါ်မှာ မူတည်နေပါတယ်။ ပြောင်းလဲပြီဆိုတာနဲ့ ပြောင်းလဲမှုဟာ မြန်ဆန်နေတဲ့အတွက် စောင့်ဆိုင်းချိန်ကို ပေးမှာမဟုတ်ပါဘူး။ လူတိုင်းပါးစပ်ဖျားမှာ ပြောင်းလဲနေတယ်။ အပြောင်းအလဲလောက (Change World) လို့လည်း ကြားနေရပါတယ်။ ဒီလိုသာ ပြောင်းလဲနေပြီပြောတယ်။ ပြောတဲ့သူက အရင်နေရာကနေ တစ်လက်မမှ မရွေ့ပဲ ဒီတိုင်းရပ်နေမယ်ဆိုရင် ဒီပြောင်းလဲမှုက ဘာပြောင်းလဲ မှုလည်း စဉ်းစားဖို့ လိုလာပါပြီ။ သည်မြန်ဆန်မှု၊ သွက်သွက်ခါ ၀ရုန်းသုန်းကား ဖြစ်မှုထဲမှာ စိတ်အလုပ် ကိုယ်အလုပ်တွေကလည်း လိုက်လံမြန်ဆန်နေကြရမှာ ဖြစ်ပါတယ်။
အထူးသဖြင့် အသက်မွေးကြောင်းနယ်ပယ် တစ်နည်းပြောရင် အလုပ်နယ်ပယ်မှာ သည်သဘောဟာ အတော်ထင်ရှားနေပါတယ်။ ကျွမ်းကျင်မှု၊ ထက်မြက်မှု၊ မျှော်မှန်းတတ်မှု၊ တွက်ဆချင့်ချိန်တတ်မှု၊ စဉ်းစားတတ် မှုတွေဟာ သာမန်တာဝန်ကျေရုံထက် ပိုမိုအရေးပါလာပါတယ်။ သူများ ပြောင်းတိုင်း ကိုယ်လည်း ပြောင်းလဲမှုထဲ ပါဝင်နိုင်ရမယ်ဆိုတဲ့ စိတ်စေတသိက် ကိန်းအောင်းထားဖို့ လိုအပ်ပါတယ်။ စီးပွားရေးဈေးကွက်အတွက် ပြည်ပမှ လုပ်ငန်းရှင်များ ၀င်လာတော့မယ်။ ရှိနှင့်ပြီးသားသူများကလည်း အရာရာအတွက် အဖက်ဖက်က လိုလေသေး မရှိ ဒီထက်ပိုမိုတိုးတက်အောင် လုပ်ဆောင်ထားရပေတော့မယ်။ ကနေ့သည် မနေ့ကနှင့် မတူတော့။ မနက်ဖြန် သည်လည်း ကနေ့နှင့် တူစရာမရှိ။ အတိတ်က သို့မဟုတ် လက်ရှိကြုံတွေ့နေရသည့် လူမှုဝန်းကျင်တွင် ကြိုတင်မမြင်နိုင်သည့် အတားအဆီးများကို ကျော်လွှားနိုင်ရမယ်။ သင်ရဲ့စိတ်ကို ပြန်စစ်ကြောပါ။ ပြောင်းလဲမှု နောက် ငါလိုက်သွားမလား၊ နေခဲ့မလားဆိုတာကိုလည်း သုံးသပ်ဖို့ လိုလာပါပြီ။ လက်လျှော့အရှုံးပေး ထွက်ပြေးသူသည် မည်သည့်အခါမျှ အောင်မြင်မည် မဟုတ်ပဲ။ အောင်မြင်သူသည်လည်း မည်သည့်အခါမျှ ထွက်မပြေးဘူးဆိုတာကို သင် မြဲမြဲမှတ်ထားလိုက်ပါ။ ပြဿနာတွေရဲ့နောက်မှ ကောင်းကောင်းကြီး ရုပ်ဖျက်ထားတဲ့ အခွင့်အရေးတွေရှိတာကို သိလည်း သိ ရှာလည်းရှာနေကြပါတယ်။ ဒီတော့ ငါ ဘာတွေ လိုအပ်နေသလဲ။ ဘာတွေပြင်ဆင်ရမလဲ။ ဘာတွေအားနည်းချက်ရှိသလဲ ကိုယ့်ကိုယ်ကိုယ် ဝေဖန်ဆန်းစစ်ပြီး ပြုလုပ်ဆောင်ရွက်ထားမှသာ အနာဂတ်ရဲ့ လုပ်ငန်းခွင်အတွက် တစ်ထောင့်တစ်နေရာ ရောက်ရှိမှာ ဖြစ်ပါတယ်။ မိမိရဲ့လုပ်ငန်းခွင်မှာ မိမိသည် ဦးဆောင်နိုင်သူလား၊ စိန်ခေါ်မှု အသစ်များကို ဖန်တီးသူလား။ နောက်လိုက် သက်သက်လား။ ခွင်ရှာသူလား၊ သူများကို အတို့အထောင်လုပ်ပြီး နေရာလိုချင်သူလား ဆိုသည့်အချက်သည် အလွန်အရေးကြီးလှပါတယ်။
ပြင်ဆင် ဆိုလို ဘာတွေပြင်ဆင်ရမလဲ။ ကိုယ့်ကိုယ်ကိုယ် ဝေဖန်ပိုင်းခြားမှုမရှိသေးရင် ကျွန်မ သိသလောက် အကြမ်းဖျင်း ပြောပြပါမယ်။ ပြင်ဆင်မှုထဲမှာ မမေ့သင့်တဲ့အချက်တွေကတော့
၁။ လုပ်ရည်ကိုင်ရည် အစွမ်းအစရှိခြင်း။
၂။ လောက၀တ်ကောင်းခြင်း။
၃။ ယုံကြည်စိတ်ချရခြင်း။
၎။ အများက ယုံကြည်လက်ခံမှုရှိခြင်း။
၅။ တာဝန်ယူ တာဝန်သိစိတ်ရှိခြင်း။
၆။ ဆက်သွယ်ဆောင်ရွက်တတ်ခြင်း ဆိုတာတွေပဲဖြစ်ပါတယ်။
ဒါတွေက ပြင်ဆင်သင့်တဲ့အထဲမှာ မပါမဖြစ်တဲ့ အချက်တွေလို့ ကျွန်မ မြင်မိပါတယ်။ ပြောင်းလဲမှုဟာ တစ်ဦးတစ်ယောက်ထဲ ပြောင်းလဲနေလို့ မရပါဘူး။ နေရာ၊ ဒေသ၊ ၀န်းကျင်၊ အဖွဲ့အစည်း စတဲ့ နေရာတိုင်း၊ လူတိုင်းက ပြောင်းလဲမှုကို ရင်ဆိုင်နိုင်ရပါမယ်။ အဖွဲ့အစည်းတွေနဲ့လည်း ပြုပြင်ပြောင်းလဲမှုတွေ လုပ်နေတာကို တွေ့လာရပါပြီ။ ကျွန်မတို့ ငယ်ငယ်တုန်းက သင်ခဲ့တဲ့အရာလေးတစ်ခုကိုလည်း အမြဲမှတ်မိနေပါတယ်။ တစ်ချို့ နေရာတွေမှာတောင် ရုပ်တုအဖြစ် ပုံဖော်ထားတာ တွေ့ရမှာဖြစ်ပါတယ်။ အဲဒါဘာလဲဆိုတော့ ထင်းချောင်း တစ်ချောင်းတည်း ချိုးတော့ အလွယ်တကူ ချိုးနိုင်ပြီး ထင်းစည်းတစ်ခုလုံး ချိုးတော့ ချိုးလို့မရတဲ့ အရာပဲ ဖြစ်ပါတယ်။ တကယ့်ကို မှတ်သားစရာပါပဲ။ နိုင်ငံတစ်နိုင်ငံမှာ ခေါင်းဆောင်တစ်ဦးထဲ ကောင်းပြီး နိုင်ငံသူ နိုင်ငံသားတွေက စည်းလုံးညီညွတ်မှု မရှိရင် မဖြစ်သလို နိုင်ငံသူနိုင်ငံသားချည်း ခေါင်းဆောင်မပါပဲ ရပ်တည်လို့ မရပါဘူး။ ငယ်ငယ်က သင်ခဲ့ဖူးတဲ့ ကျီး ဘုတ် ရိုသေ – ဘုတ်ကလည်း ကျီး ရိုသေဆိုသလိုပါပဲ။ အပြန်အလှစာနာနားလည်မှုတွေနဲ့ ကိုင်းကျွန်းမှီ ကျွန်းကိုင်းမှီ ပြုလုပ်သွားကြမယ်ဆိုရင်ဖြင့် ခေတ်မီတိုးတက် သော နိုင်ငံတော်သစ်ဆီသို့ ဆိုတဲ့ လမ်းတံတားတွေမှာ မြင်တွေ့နေရတဲ့ စာတန်းတွေဟာ ပိုမိုအသက်ဝင် လှုပ်ရှားလာမှာ ဖြစ်ပါတယ်။
ပြုပြင်ပြောင်းလဲဖို့ကတော့ ပါးစပ်ကပဲ ပြောပြီး ကိုယ်တိုင်ကိုယ်ကျ မလုပ်ဆောင်ရင်တော့ အရာ အားလုံးဟာ သဲထဲရေသွန်သလို ဖြစ်မှာ အမှန်ပါပဲ။ လောလောဆယ် မြင်တွေ့နေရတာတွေ အရင်ဆုံး ပြုပြင်ရမှာကတော့ စိတ်ပိုင်းဆိုင်ရာလို့ မြင်မိပါတယ်။ စိတ်ဓာတ်ချို့ယွင်း ပျက်ဆီးမှုတွေ၊ လူတစ်ဦးနှင့် တစ်ဦး ဖော်ရွေမှု မရှိတာတွေ၊ နောက်သည်းခံနိုင်မှု မရှိတာတွေ နေရာတိုင်းမှာ တွေ့ရှိနေရပါတယ်။ များသောအားဖြင့် အဖွဲ့အစည်းများ၊ လုပ်ငန်းရှင်များက ၀န်ထမ်းများကို အဖွဲ့ရဲ့ ရည်ရွယ်ချက်များကို သိစေပြီး ၀န်ထမ်းစိတ်ထား ရှိသင့်ကြောင်း လမ်းညွှန်ပေးသင့်ပါတယ်။ တစ်ဦးချင်း ဂုဏ်ယူတတ်မှုကို ပျိုးထောင်ရမယ်။ နောက်တစ်ဦးချင်း တစ်ယောက်ချင်းဆီမှာ စိတ်ရှည်သည်းခံခြင်းကို မွေးမြူစေသင့်ပါတယ်။ အဖွဲ့အစည်းနဲ့ လုပ်ဆောင်နိုင်ရမယ်။

ဒါကြောင့် ကျွန်မတို့ရဲ့ အိပ်မက်များ အကောင်အထည်ပေါ်လာမယ်၊ မပေါ်လာမယ်ဆိုတာကို ကြိုတင် တွေးတော စိတ်ပူကာ သံသယထားစရာမလိုပါဘူး။ ဘယ်လိုအကြောင်းပဲဖြစ်ဖြစ် ဘာတွေပဲ ပြောင်းလဲ ပြောင်းလဲ ကြံ့ကြံ့ခံ ရင်ဆိုင်နိုင်ဖို့ အသင့်ရှိနေရမှာ ဖြစ်ပါတယ်။ မဖြစ်နိုင်သည်များကို ဖြစ်အောင်လုပ်ပါ။ တစ်ဦး တစ်ယောက်ချင်းစီနှင့် တိုင်းနိုင်ငံတိုင်းရဲ့ ခံယူချက်များကို ပြောင်းလဲလိုက်ပါ။
သင် တစ်ချိန်က မက်ခဲ့သော အိပ်မက်များသည် ယခုဆိုရင် သင့်အိပ်မက်များကို ပေါ့ပေါ့တန်တန် သဘောထား၍ မရတော့ပါ။ သူတို့သည် အမှန်တကယ် အကောင်အထည်ပေါ်လာမည့်အရာများ ဖြစ်တော့ မည်။ Time and Tide, Wait for no man ဆိုတဲ့အတိုင်းပါပဲ။ အချိန်နဲ့ ဒီရေသည် လူကိုမစောင့်ဆိုသလို အရာအားလုံး ကြိုတင် ပြင်ဆင်ထားခြင်းဖြင့် လိုချင်သော ပန်းတိုင်ကို ဧကန်အမှန်ရောက်ရှိမည်ဖြစ်ပါတယ်။ ဒီပြောင်းလဲမှုကြီးသည် သိသိသာသာ ပြောင်းလဲပြီး အတိအလင်းဖြစ်ဖို့ လုပ်ခနှင့်ညီမျှသော အခကြေး ငွေရဖို့၊ လူသားတိုင်း တန်းတူ အခွင့်အရေးရရှိဖို့၊ ထိုပြောင်းလဲမှုမှရသော လုပ်ခသည် စားလောက်ရုံ မဟုတ်ဘဲ အနာဂတ်အတွက်ပါ အာမခံချက်ရှိဖို့ဆိုသည့် အဓိပ္ပာယ်များဖြင့် ဘ၀ရဲ့ ရည်ရွယ်ချက်များကို ပြည့်စုံအောင် လုပ်မှသာ အလှဆုံးနှင့် အကောင်းဆုံး အချိန်အခါပင် ဖြစ်ပေတော့တယ်။
Myanmar ICT Journal 16 - 23 2012 စာစောင်တွင် ဖော်ပြပါရှိပြီး ဖြစ်ပါသည်။

No comments: