4/17/2010

မိတ်ဆွေများနှင့် ပျော်ရွှင်မှု

နှစ်ကူးမှာ လူတိုင်းကို ပျော်ရွှင်စေချင်သည့် စိတ်ဆန္ဒဖြစ်ပေါ်နေမိပါတယ်။
အဲဒီမှာ စဉ်းစားစရာအချက်တွေ ရှိပါတယ်။ ဘာလဲဆိုတော့ လူတွေကို ပိုပြီး
စိတ်ချမ်းသာစေခြင်းသည် ပိုက်ဆံလား ဒါမှမဟုတ် ပျော်ပျော်နေတတ်သော
မိတ်ဆွေများနှင့် ကိုယ့်ရဲ့အနီးဝန်းကျင်က လူတွေလား။
ပျော်ပျော်နေတတ်သော မိတ်ဆွေများရှိခြင်းကြောင့် ကိုယ်တိုင်ကလည်း
ပျော်ရွှင်ရကြောင်း လေ့လာမှုအသစ်တွင် တွေ့ရှိရပါတယ်။ အနေအနီးအဝေးပေါ်
မူတည်ပြီး မိတ်ဆွေများအကြား အပျော်သက်ရောက်ပုံကလည်း ကွာပါတယ်။ ဥပမာ
တစ်မိုင်ခန့်အကွာတွင် မိတ်ဆွေတစ်ယောက်နေလျှင် ပျော်ရွှင်မှု ၂၀
ရာခိုင်နငန်းရနိုင်ပြီး ကပ်လျက်တွင် ပျော်ပျော်နေတတ်သော
သူတစ်ယောက်ရှိလျှင် အပျော် ၃၄ ရာခိုင်နှုန်းလောက်ရသည်လို့ ဆိုကြပါတယ်။
ထိုမိတ်ဆွေများကြောင့် ရရှိလာသော ပျော်ရွှင်မှုသည်လည်း တစ်နှစ်ခန့်
တာရှည်သည်ဟု ဆိုထားကြပြန်ပါတယ်။ သင်လည်း သင့်အနီးမှ
ပျော်ရွှင်မှုပေးနိုင်သော/ပေးနေသော မိတ်ဆွေသူငယ်ချင်းများကို အမြဲသတိရ
အမှတ်ရနေမယ်လို့ ထင်မြင်မိပါတယ်။
လူတိုင်းဝန်းကျင်မှ မိတ်ဆွေအပေါင်းအသင်းများကို
ပျော်ရွှင်မှုဝေမျှနေကြမယ်ဆိုရင် အားလုံးသည် ပျော်ရွှင်မှုနဲ့
အသက်ရှင်နေသူများဖြစ်ပါလိမ့်မယ်။ သင်လည်း ဘေးပတ်ဝန်းကျင်မှ
မိတ်ဆွေသူငယ်ချင်းများနဲ့ ပျော်ရွှင်မှုကို ခုချက်ချင်းပဲ
မျှဝေခံစားကြည့်ပါလား။ သင့်ရဲ့ ပျော်ရွှင်မှုသည် မိတ်ဆွေများထံမှတစ်ဆင့်
မိသားစု၊ အိမ်နီးချင်း၊ အလုပ်အကိုင်အထိ ကူးစက်ပျံ့နှံ့နေမယ်လို့ ကျွန်မ
မြင်မိပါတယ်။ မယုံရင် စမ်းသပ်ကြည့်လိုက်ပါ။ နိုင်ငံတကာ သုတေသီတို့က
ပျော်ရွှင်မှုသည် ကူးစက်တတ်သည်လို့ လေ့လာတွေ့ရှိထားကြပါတယ်တဲ့။ အဲ အဲဒီမှာ
ပြောစရာ ရှိလာပါလိမ့်မယ်။ ၀မ်းနည်းမှုကကော မကူးစက်တတ်ဘူးလားဆိုတဲ့
မေးခွန်းပါပဲ။ ၀မ်းနည်းမှုသည်လည်း ကူးစက်တတ်သည်ဆိုသော်လည်း
ပျော်ရွှင်မှုလောက် မဟုတ်ပေ။ ပျော်ရွှင်မှုသည် တစ်ဆင့်ပြီး တစ်ဆင့်
သုံးဒီဂရီခန့်ရောက်သွားသည့်တိုင် အပျော်က သက်ရောက်တုန်းပင် ဖြစ်ပါတယ်။
သုံးဒီဂရီဆိုသည်မှာ မိတ်ဆွေ၏ မိတ်ဆွေမှတစ်ဆင့် အခြားမိတ်ဆွေတစ်ဦးထံ
ရောက်သွားခြင်းကို ဆိုလိုတာပါ။
ငွေပိုငွေလျှံ သိန်းရာနဲ့ချီရှိခြင်းကလည်း လူတစ်ယောက်ကို ၂
ရာခိုင်နှုန်းလောက် ပျော်နိုင်သည်ဟု ပညာရှင်တွေက ဆိုထားကြပြန်ပါသေးတယ်။
ကျွန်မကတော့ ငွေကြေးအဲလောက်မရှိတဲ့အတွက်
ဘယ်လောက်ပျော်ရွှင်စရာကောင်းကြောင်း မသိသေးပါဘူး။ ဒါပေမယ့် ဒီအပျော်ကျတော့
သုံးဒီဂရီမိတ်ဆွေထံမှ ရသည့် ပျော်ရွှင်မှုထက် မပိုကြောင်း သုတေသီတို့က
ပြောကြပါတယ်။ အဲဒီမှာ စကားပုံတစ်ခုကို ကျွန်မ သတိရမိပြန်ပါတယ်။
ဘာလဲဆိုတော့ သင်ရယ်လျှင် အားလုံးလိုက်ရယ်လိမ့်မယ်။ သင် ငိုလျှင်တော့
တစ်ယောက်ထဲငိုပေတော့တဲ့။ ဒီတော့ စိတ်ချမ်းသာမှုပေးတာသည်လည်း
မိတ်ဆွေများထံမှလို့ သင်ယူဆလို့ရပြီလား။ သင့်ဝန်းကျင်ကို အပျော်များနဲ့
ဖန်တီးချင်ရင်တော့ သင့်ထံမှ ပျော်ရွှင်မှုများကို မိတ်ဆွေအပေါင်းအသင်း
သူငယ်ချင်းများကို ခုချက်ချင်းပဲ ဝေမျှပေးလိုက်ပါလို့ ပြောကြားရင်း
ပျော်ရွှင်မှုရှိသောသူသည် အောင်မြင်မှုကို အလွယ်တကူဖမ်းဆုပ်ယူနိုင်တဲ့လူသာ
ဖြစ်ပါကြောင်း သင့်အား ကျွန်မရဲ့ ပျော်ရွှင်မှုများကို
ပြန်လည်ဝေမျှလိုက်ပါတယ်။ ပျော်ရွှင်မှုများနဲ့အတူ မိတ်ဆွေများလည်း
တိုးပွားနိုင်ပါစေလို့ နှစ်သစ်မှာ ဆုတောင်းလိုက်ပါတယ်နော်။
ပျော်ရွှင်ချမ်းမြေ့ပါစေ။

No comments: